នីតិវិធីតម្កល់ និងដកប្រាក់កក់ធានាការអនុវត្តន៍កិច្ចសន្យា (The deposit procedures and refund deposit guarantee for contract implementation)

យោងតាមសារាចរណែនាំ របស់ក្រសួងសេដ្ឋកិច្ច ហិរញ្ញវត្ថុថ្មីៗនេះបានឲ្យដឹងថាក្នុង រយៈកាលកន្លងមកក្រសួងសេដ្ឋកិច្ច និងហិរញ្ញវត្ថុបានពិនិត្យឃើញថា ក្រសួង ស្ថាប័នមានសមត្ថកិច្ចបានចុះកិច្ចសន្យាផ្សេងៗមានជាអាទិ៍ កិច្ចសន្យាសម្បទាន កិច្ចសន្យាវិនិយោគ កិច្ចសន្យាជួល កិច្ចសន្យាផ្សេងៗទៀតជាមួយក្រុមហ៊ុនឯកជន ដែលតាមរយៈនេះ បានតម្រូវឲ្យភាគីឯកជនតម្កល់ប្រាក់កក់សម្រាប់ធានា ការអនុវត្តន៍កិច្ចសន្យា។ ប្រាក់កក់ទាំងនោះ ត្រូវបានតម្កល់នៅតាមក្រសួងស្ថាប័នជាប់កិច្ចសន្យា ឬនៅធនាគារពាណិជ្ជកម្មមួយចំនួន។

ដោយពិនិត្យឃើញរូបភាពនៃការកក់ប្រាក់ធានានេះក្រសួងសេដ្ឋកិច្ច និងហិរញ្ញវត្ថុបានរៀបចំជូនរាជរដ្ឋាភិបាលដាក់ចេញអនុក្រឹត្យលេខ៨២អនក្រ.បក ចុះថ្ងៃទី ១៦ ខែវិច្ឆិកា ឆ្នាំ១៩៩៥ ស្តីពីបទបញ្ជាទូទៅនៃគណនេយ្យសាធារណៈ និងជាបន្តបន្ទាប់មានសារាចរណែនាំ និងប្រកាស ដើម្បីកំណត់វិធី ឲ្យ អនុវត្តក្នុងការកក់ ប្រាក់ធានាការអនុវត្តន៍កិច្ចសន្យា។ បន្ទាប់ពីការចេញអនុក្រឹត្យសារាចរណែនាំ និង ប្រកាសជាបន្តបន្ទាប់ ក្រសួងស្ថាប័នមួយចំនួនបានអនុវត្ត ប៉ុន្តែទន្ទឹមនេះក៏នៅមានក្រសួងស្ថាប័នដ៏ទៃទៀតនៅពុំទាន់ បានអនុវត្តពេញលេញនៅឡើយ ដោយក្រសួងស្ថាប័នជាប់កិច្ចសន្យាមួយចំនួននៅតែបន្តតម្កល់ប្រាក់កក់ ធានាការអនុវត្តន៍កិច្ចសន្យា ក្នុងគណនីរបស់ខ្លួន ដដែល។ ប្រការនេះមានផលអវិជ្ជមានជាច្រើនដូចជា ការពុំបានឆ្លុះបញ្ជាំង នូវតម្លា ភាពពិតប្រាកដ បេឡា ថវិកាជាតិ ពុំអាចមានលទ្ធភាពធ្វើការកែនប្រមូលសាច់ប្រាក់ទាំងនេះយកមកធ្វើចរាចរបានមិនធានាសុវត្ថិភាពដោយការតម្កល់នៅធនាគារពាណិជ្ជអាចជួបនូវហានិភ័យជាយថាហេតុ។

អនុលោមតាម ច្បាប់ស្តីពីប្រព័ន្ធហិរញ្ញវត្ថុសាធារណៈ ដែលប្រកាសឲ្យប្រើដោយព្រះរាជក្រមលេខ នស/រកម ០៥០៨/១៦ ចុះថ្ងៃទី ១៣ខែឧសភា ឆ្នាំ២០០៨ អនុក្រឹត្យលេខ ៨២ អនក្រ.បក ចុះថ្ងៃទី ១៦ខែវិច្ឆិកា ឆ្នាំ១៩៩៥ សារាចរណែនាំ និងប្រកាសនានាដែលបានកំណត់នីតិវិធីបង់ប្រាក់កក់ តាមកម្មវិធី កែទម្រង់ ការគ្រប់គ្រងហិរញ្ញវត្ថុសាធារណៈ របស់រាជរដ្ឋាភិបាល ការបង្កើតប្រសិទ្ធភាពនៃការគ្រប់គ្រង សាច់ប្រាក់ពីប្រភព ប្រាក់កក់ ការរក្សាសុវត្ថិភាព ក្នុងការតម្កល់ប្រាក់កក់ និងការផ្តល់ការជឿទុកចិត្តរឹងមាំ បន្ថែមទៀតដល់ភាគីឯកជន ក្រសួងសេដ្ឋកិច្ច ហិរញ្ញវត្ថុសូមធ្វើការណែនាំដូចតទៅ។

១- ប្រាក់តម្កល់ទោះមានរូបភាពជា ប្រាក់កក់ ប្រាក់ធានា ឬមានរូបភាពផ្សេងទៀត ដែលដាក់តម្កល់ សំរាប់ធានាការអនុវត្តន៍កិច្ចសន្យានានា មានជាអាទិ៍ ៖ កិច្ចសន្យាសម្បទានដីសំរាប់វិស័យកសិកម្ម និងទេសចរណ៍ កិច្ចសន្យាសម្បទានរុករក និងធ្វើអាជីវកម្មធនធានរ៉ែ កិច្ចសន្យាសម្បទានទាក់ទងនឹង សំណង់ហេដ្ឋារចនាសម្ព័ន្ធ កិច្ចសន្យាផ្តល់សេវាសាធារណៈ ឬទទួលសេវាសាធារណៈ កិច្ចសន្យាវិនិយោគ កិច្ចសន្យាជួល កិច្ចសន្យាទិញ ឬលក់ទំនិញ និងកិច្ចសន្យាផ្សេងទៀត រួមទាំងសំរាប់ការចេញអាជ្ញាប័ណ្ណ ឬការធានានានា ចាប់ពីពេលនេះតទៅ ត្រូវកំណត់ថា “ប្រាក់កក់” នៅក្រោមសារាចរនេះ ដោយមិនគិតពីឈ្មោះដែលបានប្រើប្រាស់ សំរាប់ការដាក់តម្កល់នោះឡើយ។

 ២- រាល់ប្រាក់កក់ទាំងអស់ត្រូវកំណត់ឲ្យបង់ចូលក្នុងគណនីទោលរតនាគារ របស់អគ្គនាយកដ្ឋានរតនាគារជាតិក្នុងរយៈពេលយ៉ាងយូរពី ៧ថ្ងៃ ទៅ ៣០ថ្ងៃក្រោយកិច្ចសន្យាចូលជាធរមាន ឬតាមខ្លឹមសារដែលមានចែងក្នុងកិច្ចសន្យា។

៣- ប្រាក់កក់ត្រូវបានផ្ទេប្រគល់ជូនភាគីកិច្ចសន្យា ឬអ្នកកក់ប្រាក់ ឬអ្នកទទួលអាជ្ញា ប័ណ្ណវិញ នៅពេលដល់កាលវសាន្តនៃការដកប្រាក់កក់ ឬតាមល័ក្ខខ័ណ្ឌដែលបានកំណត់ក្នុងកិច្ចសន្យា។

 ៤- ចំពោះប្រាក់កក់ ដែលកំពុងតម្កល់នៅគណនីរបស់ក្រសួង ស្ថាប័នសាមី ត្រូវចាត់ចែង ផ្ទេចូលក្នុង គណនីទោលរតនាគារ របស់អគ្គនាយកដ្នានរតនាគារជាតិជាការប្រញាប់។

៥- គណនីទោលរតនាគារ របស់អគ្គនាយកដ្នានរតនាគារជាតិ សំរាប់ប្រាក់រៀលមានលេខ ០០០០០០០០ ១១១១ និងសំរាប់ប្រាក់រូបិយវត្ថុដុល្លារអាមេរិកមានលេខ ០០០០០០០០ ១៣៣៣ នៅធនាគារជាតិនៃកម្ពុជា ។

៦- ភាគីកិច្ចសន្យា អ្នកកក់ប្រាក់ ឬអ្នកទទួលបានអាជ្ញាប័ណ្ណ ត្រូវប្រគល់ប័ណ្ឌបង់ប្រាក់កក់ ដែល ចេញដោយ ធនាគារជាតិនៃកម្ពុជា ជូនទៅភាគីក្រសួង ស្ថាប័នជាប់កិច្ចសន្យាចំនួនមួយច្បាប់ និងជូនទៅ ក្រសួងសេដ្ឋកិច្ច និងហិរញ្ញវត្ថុដែលជាក្រសួងមានសមត្ថកិច្ចផ្តល់ការយល់ព្រមលើកិច្ចសន្យាចំនួនមួយច្បាប់ ដើម្បីត្រួតពិនិត្យ និងតាមដានការអនុវត្តន៍កិច្ចសន្យា ។

៧- ការដកប្រាក់កក់ត្រូវអនុវត្តតាមបែបបទដូចខាងក្រោមនេះ ៖

ក្រសួង ស្ថាប័នជាប់កិច្ចសន្យាត្រូវពិនិត្យ និងបញ្ជូនសំណើសុំដកប្រាក់កក់របស់ភាគីកិច្ចសន្យា អ្នកកក់ប្រាក់ ឬអ្នកទទួលអាជ្ញាប័ណ្ណដោយភ្ជាប់មកជាមួយនូវកិច្ចសន្យា ប័ណ្ណបង់ប្រាក់ និងឯក សារបញ្ជាក់ពីការបាន បំពេញលក្ខខណ្ឌក្នុងកិច្ចសន្យាកំណត់ ហេតុប្រគល់ទទួលសំណង់ ឬសម្ភារៈ មក ក្រសួងសេដ្ឋកិច្ច និងហិរញ្ញវត្ថុ (អគ្គនាយកដ្នានរតនាគារជាតិ) ក្នុងរយៈពេល ៥ថ្ងៃ ។ ក្នុងករណីដែលក្រសួងស្ថាប័នជាប់កិច្ចសន្យាពិនិត្យ ឃើញថា មិនទាន់ដល់កាលវសាន្ត ឬក៏ភាគីកិច្ចសន្យា អ្នកកក់ប្រាក់ ឬអ្នកទទួលអាជ្ញាប័ណ្ណ មិនទាន់បានបំពេញលក្ខខណ្ឌ ដែលអាចដកប្រាក់កក់វិញបាន ឬមិនបានភ្ជាប់ ឯកសារពាក់ព័ន្ធបានគ្រប់គ្រាន់នោះ ក្រសួង ស្ថាប័នជាប់កិច្ចសន្យាត្រូវបញ្ជូនសំណើត្រឡប់ទៅភាគីឯកជនវិញជាបន្ទាន់។

៨- ដោយឡែកនីតិវិធី និងបែបបទកក់ប្រាក់ធានាការដេញថ្លៃ និងប្រាក់កក់ធានាការអនុវត្តន៍កិច្ចសន្យាលទ្ធកម្មត្រូវអនុវត្តតាមវិធាននិងបទប្បញ្ញត្តិស្តីពីលទ្ធកម្មសាធារណៈ ដូចមានចែងក្នុងសៀវភៅលទ្ធកម្ម។

៩- ក្រសួង ស្ថាប័នមានសមត្ថកិច្ចពាក់ព័ន្ធត្រូវទទួលខុសត្រូវអនុវត្តនីតិវិធីតម្កល់ និងដកប្រាក់ កក់ធានាការ អនុវត្តន៍កិច្ចសន្យាឲ្យបានម៉ឺងម៉ាត់ ជៀសវាងដាច់ខាតការបង្កការលំបាកធ្វើឲ្យប៉ះពាល់ ផលប្រយោជន៍ និងសតិអារម្មណ៍របស់ភាគីកិច្ចសន្យា អ្នកកក់ប្រាក់ ឬអ្នកទទួលអាជ្ញាប័ណ្ណ។

ប្រភព៖ ទីភ្នាក់ងារសារព័ត៌មានកម្ពុជា (AKP)