ការដាក់ទណ្ឌកម្មនៃច្បាប់នីមួយៗ (The Sanctions of Each Law)

យុគសម័យបច្ចុប្បន្ននេះ មិនថាជនណាក៏ដូចជនណាទេ តែងតែស្រលាញ់នូវសេចក្តីសុខ សន្តិភាព សេរីភាព និង បូរណភាពទឹកដី ពោលគឺរស់នៅក្នុងសង្គមមួយពោរពេញទៅដោយឯករាជ្យជាតិបរិបូរណ៍។ មិនតែប៉ុណ្ណោះ ការដឹកនាំរបស់រាជរដា្ឋភិបាលត្រូវមានគុណភាពល្អដោយមានបទពិសោធន៍ដឹកនាំគួបផ្សំនឹងលក្ខណៈដឹកនាំល្អ។ កត្តាដែលសំខាន់គឺការរិះរកមធ្យោបាយនានាមកដោះស្រាយនូវរាល់បញ្ហាដែលកើតមានឡើងនៅក្នុងសង្គមជាតិ ទន្ទឹមនឹងនេះដែរគឺការផ្តល់សិទ្ឋិសេរីភាព គ្រប់គ្រាន់ដល់ប្រជាពលរដ្ឋ និង គោរពលទ្ឋិប្រជាធិបតេយ្យ ។ ការរៀបចំសង្គមឲ្យបានល្អយ៉ាងនេះ ទាមទារឲ្យមានការបង្កើតច្បាប់នៅក្នុងសង្គម។

ហេតុអ្វីចាំបាច់ត្រូវមានច្បាប់?

យើងតែងតែសង្កេតឃើញថា ច្បាប់គឺជាវិធានបទដ្នានគតិយុត្តដែលទាមទារឲ្យមានការគោរពពីសំណាក់ប្រជាពលរដ្ឋដែលរស់នៅក្រោមច្បាប់។ ដើម្បីការពារឲ្យ ច្បាប់មានការគោរពពីសំណាក់អ្នកដទៃ ចាំបាច់គឺ តម្រូវឲ្យមានទណ្ឌកម្ម ព្រោះថាមនុស្សមាននិស្ស័យម្យ៉ាង គឺការហ៊ានប្រព្រឹត្តអ្វីមួយតាមទំនើងចិត្តរបស់ខ្លួន តាមចិត្ត គំនិតដែលខ្លួនចង់ធ្វើគ្មានការបង្ខំពីសំណាក់អ្នកដទៃ នេះជាមូលហេតុមួយដ៏ធ្ងន់ និង ងាយស្រួលដែលមនុស្សដើររំលងច្បាប់ មិនខ្លាចច្បាប់ដោយសារគេគិតថាការប្រព្រឹត្តរបស់គេសមស្របនឹងបំនងគេ ហើយគ្មានអ្វីមកហាមឃាត់គេឡើយ គេអាចបង្កើតជំលោះទាស់ទែងគ្នា ជេរប្រមាទគ្នាទៅវិញទៅមក បកអាក្រាត និង និយាយពាក្យមិនគួរសមជាច្រើន ហើយការបង្កើតច្បាប់នេះបែរជាគ្មានប្រយោជន៍ទៅវិញ តែផ្ទុយស្រលះប្រសិនជាច្បាប់មានលាយឡំនូវទណ្ឌកម្មលើជននានា ដែលបានប្រព្រឹត្តខុសឆ្គងទៅនឹងច្បាប់នានារបស់សង្គម ដោយសារពួកគេទាំងនោះខ្លាចទទួលទោសពិន័យនូវកំហុសឆ្គងរបស់គេ ដូចនេះមុនគេធ្វើអ្វីមួយគេបានពិចារណារួចជាស្រេចថាការប្រព្រឹត្តរបស់គេត្រឹមត្រូវ ឬ យ៉ាងណានោះ។ មិនតែប៉ុណ្ណោះទេ ប្រសិនបើគ្មានការបង្កើតទណ្ឌកម្មទេនោះ សង្គមនឹងជួបប្រទះតែនឹងភាពចលាចល សង្រ្គាម គ្រោះមហន្តរាយ ការកាប់ចាក់ សំលាប់ ប្លន់តាមតែអំពើចិត្តរបស់គេ ព្រោះការធ្វើបែបនេះគ្មានការហាមឃាត់ ដាក់ទណ្ឌកម្ម ហើយចំនេញបានបា្រក់ដោយមិនចាំបាច់ធ្វើការសោះ អាចរស់នៅបានយ៉ាងស្រួល តែកាលណាដែលច្បាប់បានដាក់ពិន័យដល់ពួកទាំងនោះ ភាពអវិជ្ជមាននឹងពុំសូវជូបប្រទះក្នុងសង្គមទៀតឡើយ។ តែនៅមានជនខិលខូចមួយចំនួននៅតែប្រព្រឹត្ត ហើយបុគ្គលទាំងឡាយនោះដែលត្រូវច្បាប់ដាក់ទណ្ឌកម្មតាមកំហុសឆ្គងដែលសមនឹងការប្រព្រឹត្តរបស់ពួកគេ។

យ៉ាងណាមិញយើងឃើញ ថាក៏ មានជន មួយចំនួនដែលប្រព្រឹត្តខុសនឹងច្បាប់ដោយអចេតនាដោយសារភាពល្ងង់ខ្លៅផ្នែកគតិយុត្ត និង ការរស់នៅដាច់ស្រយាលជាដើម ពួកគេមិនដែលបានដឹងថាច្បាប់ជាអ្វី ហើយបានហាមឃាត់ ដាក់ទោសលើផ្នែកអ្វីសោះ នេះជាមូលហេតុមួយពិបាកក្នុងការសំរេចដាក់កំហុសលើពួកគេណាស់ តែយើងឃើញហើយថា នៅពេលដែលច្បាប់មួយបានចូលជាធរមាន ទោះបីបុគ្គលនោះបានដឹង ឬ មិន ដឹងក៏ដោយ ក៏ច្បាប់មិនបានលើកលែងទោសឲ្យបានដែរ គឺច្បាប់ចង់ឲ្យពួកគេរាង ចាលនឹងកំហុសឆ្គង របស់ពួកគេនោះ។ យើងអាចនិយាយបានថាច្បាប់គឺជាវិធានមួយដែលមាន ការបង្ខិតបង្ខំ តម្រូវឲ្យជនគ្រប់រូបគោរពតាម ប៉ុន្តែមិនមែនមានន័យថាគេចេះតែបង្កើតច្បាប់ឡើង ដោយគ្មានការពិចារណានោះទេ ពោលគឺគេបានថ្លឹងថ្លែងរួចហើយថាច្បាប់ដែលបានបង្កើតសុទ្ឋតែ មានគោលបំណងចង់ឲ្យសង្គមល្អ និង មានសណ្តាប់ធ្នាប់។ ដើម្បីឲ្យច្បាប់កាន់តែមានប្រសិទ្ឋិភាព ទាមទារឲ្យមានការចូលរូមអនុវត្តច្បាប់នេះពីសំណាក់រាជរដ្ឋាភិបាលនិងប្រជាពលរដ្ឋទាំងអស់ព្រោះ ថាការបង្កើតច្បាប់គឺដើម្បីប្រជាពលរដ្ឋ ហើយក៏ដើម្បី រដ្ឋមានភាពល្អត្រឹមត្រូវប្រសើរផងដែរ។